عقیدۂ تثلیث کی تردید اور حضرت عیسیٰ علیہ السلام کی براءت

تشریحی نوٹس

1۔ اللہ ایک ہے، اس کا کوئی شریک نہیں

اللہ تعالیٰ ایک ہے، اس کے ساتھ کوئی شریک نہیں۔ جیسے حضرت آدم علیہ السلام کو بغیر ماں باپ کے پیدا فرمایا، اسی طرح حضرت عیسیٰ علیہ السلام کو اللہ پاک نے اپنی قدرت سے بغیر باپ کے حضرت مریم علیہا السلام کے بطن سے پیدا فرمایا۔

2۔ تمام انبیاء کی ایک ہی دعوت — پہلے بندگی، پھر رسالت

حضرت عیسیٰ علیہ السلام نے بھی وہی بات فرمائی جو باقی تمام پیغمبروں نے فرمائی۔ اُس وقت جو لوگ گمراہ ہو چکے تھے، انہیں اللہ پاک کے بارے میں صحیح بات بتائی، اور اپنے بارے میں اللہ کی بندگی کی بات بتائی۔

جیسے آپ صلی اللہ علیہ وآلہ وسلم کے ساتھ کلمۂ شہادت میں کیا ترتیب ہے؟ پہلے "عَبْدُهُ" ہے، اس کے بعد "وَرَسُولُهُ"۔ یعنی آپ صلی اللہ علیہ وآلہ وسلم پہلے اپنے آپ کو اللہ کا بندہ فرماتے ہیں، رسالت اس کے بعد ہے۔ اور یہی سب رسولوں کا معاملہ ہے کہ وہ اللہ کے بندے ہیں۔

3۔ انسان میں تین نظام — اور عقل کا کام

ہمارے ساتھ اللہ پاک نے تین سسٹم بنائے ہیں: عقل، قلب اور نفس۔

عقل کا کام غور و فکر ہے۔ اب جیسے ایک کہکشاں ہے، اس میں اربوں ستارے ہوتے ہیں۔ اور پھر یہ کہکشائیں بھی کھربوں کی تعداد میں ہیں، اور معلوم نہیں اس سے آگے کتنی ہیں — یعنی جتنی ہمیں نظر آتی ہیں، اُن سے آگے مزید ہیں۔ اب ان کی پیمائش کیسے کریں! لیکن یہ سب موجود ہے۔

جب یہ صورتِ حال ہے تو چاہیے کہ لوگ اللہ پاک کی عظمت کو مان لیں اور اللہ کی بات کو مان لیں۔

4۔ تکوین اور شریعت — پیغمبر اپنی طرف سے کچھ نہیں کہتے

جس طرح اللہ پاک کی تکوین ہے، اسی طرح اللہ پاک نے شریعت بھی بھیجی ہے۔ جتنے بھی پیغمبر آئے، انہوں نے وہی بات کی جو اللہ کی بات تھی؛ اپنی طرف سے کوئی بات نہیں بتائی۔ جیسا کہ آپ صلی اللہ علیہ وآلہ وسلم کے بارے میں قرآن میں اللہ پاک نے فرمایا کہ وہ خود سے کوئی بات نہیں کرتے، بس وہی کہتے ہیں جو ان کی طرف وحی کی جاتی ہے۔

حجۃ الوداع کے موقع پر آپ صلی اللہ علیہ وسلم نے صحابہ کرام سے پوچھا: "کیا میں نے اللہ کا پیغام تم تک پہنچا دیا ہے؟" اس سوال پر وہاں موجود ایک لاکھ سے زائد صحابہ کرام رضی اللہ عنہم نے یک زبان ہو کر جواب دیا:

"ہم گواہی دیتے ہیں کہ یقیناً آپ نے (اللہ کا پیغام) پہنچا دیا، (امانت کا) حق ادا کر دیا، اور (امت کی) پوری خیر خواہی فرمائی۔"

یہ جواب سن کر رسول اللہ صلی اللہ علیہ وسلم نے اپنی شہادت کی انگلی آسمان کی طرف اٹھائی، پھر اسے لوگوں کی طرف جھکاتے ہوئے تین بار فرمایا: (اے اللہ! تو گواہ رہ)۔

تو پیغمبر صلی اللہ علیہ وآلہ وسلم نے ہر بات ٹھیک ٹھیک پہنچا دی — اپنی طرف سے ایک لفظ بھی نہیں۔

5۔ رسوم بمقابلہ شریعت

لوگوں نے شریعت کے مقابلے میں رسمیں بنا لیں۔ جیسے "رسمِ قل" — یعنی اسے باقاعدہ "رسم" ہی کہا جاتا ہے۔ وجہ کیا ہے؟ یہ کہ یہ شریعت میں ہے ہی نہیں، یہ لوگوں کی بنائی ہوئی رسم ہے۔

6۔ اصل بات — نفس کی اصلاح

اصل بات یہ ہے کہ درمیان میں ہمارے ساتھ نفس ہے، اور اس کے ساتھ شیطان لگا ہوا ہے۔ اگر نفس کی تربیت ہو جائے تو شیطان کچھ نہیں کر سکتا۔

سورۂ شمس میں دیکھیں — کیا اس میں شیطان کے بارے میں کچھ موجود ہے؟ نہیں ہے۔ اس میں پہلے تکوینی چیزوں کی قسم کھائی گئی اور تکوینی باتیں بیان ہوئیں، پھر شریعت کا حکم بیان فرمایا:

• ابتدائی آیات میں تکوینی مظاہر کی قسم۔
• پھر نفس کی قسم، اور فرمایا کہ اس میں تقویٰ اور فجور دونوں کا الہام کر دیا گیا۔
• پھر فیصلہ: جو اسے پاک کر لے وہ کامیاب ہے، اور جو ایسا نہ کر سکے وہ ناکام، تباہ و برباد ہے۔
• پھر اُس شخص کی مثال بیان فرمائی جس نے نفس کی وجہ سے اللہ کی اونٹنی کو مارا، حالانکہ پیغمبر نے اسے منع فرمایا تھا۔ پھر اللہ پاک نے اسے اور پوری قوم کو ملیامیٹ کر دیا۔

اس کا مطلب یہ ہے کہ بنیادی چیز نفس کی اصلاح ہے۔ یہ ہو جائے تو شیطان کچھ بھی نہیں کر سکتا۔

7۔ قیامت کے دن شیطان کی براءت

جب کافر اور گنہگار جہنم کی آگ میں جھونکے جائیں گے، تو وہ اپنے اصل گمراہ کرنے والے کو ڈھونڈیں گے اور غصے میں تڑپ کر کہیں گے:

"اے ہمارے رب! ہمیں جنوں اور انسانوں میں سے وہ دونوں دکھا جنہوں نے ہمیں گمراہ کیا تھا، تاکہ ہم انہیں اپنے پیروں تلے کچل ڈالیں تاکہ وہ سب سے نیچے (ذلیل) ہو جائیں۔"

اور شیطان جواب میں کہے گا:

"یقیناً اللہ نے تم سے سچا وعدہ کیا تھا، اور میں نے بھی تم سے وعدے کیے تھے مگر میں نے اپنے وعدے کی خلاف ورزی کی۔ میرا تم پر کوئی زور تو تھا نہیں، سوائے اس کے کہ میں نے تمہیں (برائی کی طرف) پکارا اور تم نے میری بات مان لی۔ لہٰذا اب مجھے ملامت نہ کرو، بلکہ خود اپنے آپ کو ملامت کرو۔ نہ میں تمہاری فریاد رسی کر سکتا ہوں اور نہ تم میری فریاد سن سکتے ہو۔"

اور جہنمی یہ بھی کہیں گے:

وَقَالُوا رَبَّنَا إِنَّا أَطَعْنَا سَادَتَنَا وَكُبَرَاءَنَا فَأَضَلُّونَا السَّبِيلَا ﴿٦٧﴾ رَبَّنَا آتِهِمْ ضِعْفَيْنِ مِنَ الْعَذَابِ وَالْعَنْهُمْ لَعْنًا كَبِيرًا

"اور کہیں گے: اے ہمارے رب! ہم نے اپنے سرداروں اور اپنے بڑوں کا کہنا مانا تھا، پس انہوں نے ہمیں سیدھے راستے سے بھٹکا دیا۔ اے ہمارے رب! تو ان کو دگنا عذاب دے اور ان پر بہت بڑی لعنت کر۔"

قرآن میں یہ سارا موجود ہے، اور یہ سب کچھ ہو کر رہے گا۔

8۔ حسد — دو دھاری تلوار

شیطان ایسا ظالم ہے کہ خود حسد کی وجہ سے تباہ ہوا، اور ساتھ کتنے ہی اوروں کو بھی خراب کیا — اور یہ سارا حسد کی وجہ سے ہے۔

حسد ایسی دو دھاری تلوار ہے کہ حاسد دوسرے کو بھی نقصان پہنچاتا ہے اور خود کو بھی، کیونکہ حسد کی آگ ایسی ظالم چیز ہے کہ انسان خود بھی جلتا ہے اور دوسرے کو بھی جلاتا ہے۔ انسانوں میں جب کوئی حسد کرتا ہے تو دوسرے کو یہ نقصان پہنچتا ہے کہ اسے کوئی دنیاوی یا جسمانی نقصان اٹھانا پڑتا ہے؛ اور خود کو دو طرح سے نقصان دیتا ہے:

• دنیا میں: جلن اور کڑھن سے بیماریاں لگ جاتی ہیں۔
• آخرت میں: نیکیاں یوں برباد ہوتی ہیں جیسے آگ لکڑیوں کو کھا جاتی ہے۔

تو اپنے آپ کو اس حسد سے بچانا ضروری ہے۔ اور اس سے نکلنا آسان نہیں ہے — اس کے لیے نفس کی مکمل اصلاح کی ضرورت ہے۔

9۔ نفس کے مدارج

نفسِ امّارہ: پہلے نفس امّارہ ہوتا ہے، جیسے حضرت یوسف علیہ السلام نے فرمایا:

وَمَا أُبَرِّئُ نَفْسِي ۚ إِنَّ النَّفْسَ لَأَمَّارَةٌ بِالسُّوءِ إِلَّا مَا رَحِمَ رَبِّي ۚ إِنَّ رَبِّي غَفُورٌ رَّحِيمٌ

"اور میں اپنے نفس کی پاکیزگی کا دعویٰ نہیں کرتا، یقیناً نفس تو برائی پر بہت زیادہ اکسانے والا ہے، سوائے اس کے جس پر میرا رب رحم فرمائے۔ بے شک میرا رب بہت بخشنے والا، نہایت رحم کرنے والا ہے۔"

نفسِ لوّامہ: جب انسان کو غلطی کا احساس ہوتا ہے، اس پر ندامت ہوتی ہے اور وہ توبہ کرتا ہے — کبھی گناہ ہو جاتا ہے اور کبھی توبہ کر لیتا ہے — تو یہ نفسِ لوّامہ ہے۔

نفسِ مطمئنہ: پھر مزید اصلاح سے آخر میں نفسِ مطمئنہ آتا ہے۔ قرآن میں تینوں کا نام موجود ہے، اور کرنا تو نفسِ مطمئنہ ہے۔

10۔ حضرت عیسیٰ علیہ السلام کا اعلانِ براءت اور بطلانِ تثلیث

قیامت کے دن حضرت عیسیٰ علیہ السلام اپنے ماننے والوں کے عقیدۂ تثلیث اور شرک سے مکمل براءت کا اعلان فرمائیں گے۔

عیسائی عقیدے میں تثلیث کا مطلب ہے "ایک میں تین" یا "تین میں ایک" — یعنی (خدا، حضرت عیسیٰ علیہ السلام اور حضرت جبرئیل علیہ السلام) کو ایک خدا ماننا؛ جو توحید اور عقلِ سلیم دونوں کے خلاف ایک باطل نظریہ ہے۔

انبیاء کرام علیہم السلام نے تو صرف اللہ کی بندگی کا حکم دیا تھا؛ لوگوں نے نفسانی خواہشات اور رسوم و رواج کے تحت عقائد بگاڑ لیے، اور اس میں آباؤ اجداد کی پیروی کو ذریعہ بنایا۔

11۔ عیسائی رسوم اور ان کی بنیاد

صلیب: مسیحی رسم میں مرنے والے کو صلیب (Cross) پہنائی جاتی ہے۔ عیسائیت میں صلیب کو حضرت عیسیٰ علیہ السلام کی قربانی اور نجات کا نشان مانا جاتا ہے۔ تدفین کے وقت مرنے والے کے گلے میں صلیب کا لاکٹ پہنایا جاتا ہے یا کفن پر صلیب کا نشان بنایا جاتا ہے — اس عقیدے کے ساتھ کہ یہ نشان مرنے والے کے لیے گناہوں سے نجات کا باعث بنتا ہے۔

اس کی بنیاد کیا ہے؟ عیسائیوں کا نظریہ ہے کہ ہر انسان گناہگار ہی پیدا ہوتا ہے اور اپنی کوشش سے اس موروثی گناہ سے پاک نہیں ہو سکتا، اس لیے گناہ کی سزا (موت اور جہنم) ملنا ضروری تھی۔ اس کا حل انہوں نے یہ نکالا کہ خدا نے — نعوذ باللہ — اپنے "اکلوتے بیٹے" (حضرت عیسیٰ علیہ السلام) کو دنیا میں بھیجا تاکہ وہ تمام انسانوں کے گناہوں کا بوجھ اپنے اوپر لے لیں، اور انہوں نے صلیب پر جان دے کر پورے انسانوں کے گناہوں کا کفارہ ادا کر دیا، تاکہ جو کوئی ان پر ایمان لائے اس کے گناہ معاف ہو جائیں۔ ایسی عجیب کہانی شیطان نے ان کے لیے بنائی ہوئی ہے۔

اعترافِ گناہ (Confession): پھر عیسائیوں میں یہ ہے کہ آدمی پادری کے سامنے ایک خاص رسم ادا کرتا ہے جسے اعترافِ گناہ کہا جاتا ہے۔ پادری اس کا گناہ سنتا ہے اور اسے معافی دے دیتا ہے — چلو جی، سب کیا کرایا ختم!

مقدس پانی: اور چرچ میں سر پر مقدس پانی ڈالا جاتا ہے، اور کہتے ہیں کہ اس سے انسان کے پچھلے تمام گناہ دھل جاتے ہیں۔

12۔ اس کے مقابلے میں شریعت کا اصول

دوسری طرف دیکھیے کہ آپ صلی اللہ علیہ وآلہ وسلم نے اپنی لاڈلی بیٹی سیدہ فاطمہ زہرا سلام اللہ علیہا کو کیا نصیحت فرمائی — کہ خود عمل کرنا پڑے گا، صرف اس بنا پر نہیں بچ جاؤ گی کہ میری بیٹی ہو:

يَا فَاطِمَةُ، أَنْقِذِي نَفْسَكِ مِنَ النَّارِ، فَإِنِّي لَا أَمْلِكُ لَكُمْ مِنَ اللَّهِ شَيْئًا

"اے فاطمہ! اپنے آپ کو آگ سے بچاؤ، میں اللہ تعالیٰ کی طرف سے (کسی مؤاخذے کی صورت میں) تمہارے لیے کسی چیز کا اختیار نہیں رکھتا۔"

[صحیح مسلم، کتاب الإیمان، حدیث: 501] — [صحیح البخاری، کتاب تفسیر القرآن، حدیث: 4771]

تو ہمیں رسوم کو اپنانے کی بجائے شریعت پر عمل کرنا چاہیے، ورنہ نقصان ہی نقصان ہے۔ اللہ پاک ہمیں بچائے۔

---

درسِ قرآن کے آخری دو نکات

• قرآن مجید میں اہلِ کتاب اور مشرکین کے دلائل کے مکمل جوابات موجود ہیں، کیونکہ یہ ہمہ گیر علم رکھنے والے اللہ کا کلام ہے۔
• انسان کی اصل کامیابی صحیح عقائد پر جم کر رہنے، اور درست علم کے مطابق اخلاص کے ساتھ اعمال کرنے میں ہے۔

---

خانقاہ رحمکاریہ امدادیہ، راولپنڈی